Hifadhi ya Taifa ya Serengeti imevuka lengo lake la ukusanyaji wa mapato kwa mwaka wa fedha 2024/2025 baada ya kufanikisha makusanyo ya jumla ya shilingi bilioni 5.8, ikiwa ni zaidi ya matarajio ya awali.
Kwa mujibu wa taarifa iliyotolewa na uongozi wa Hifadhi hiyo, mafanikio hayo yametokana na kuongezeka kwa idadi ya watalii wa ndani na wa kimataifa, pamoja na mikakati madhubuti ya kiusimamizi katika ukusanyaji wa mapato.
“Tunaendelea kushuhudia ongezeko la watalii na uboreshaji wa huduma kwa wageni, hali ambayo imechangia kwa kiasi kikubwa kufanikisha malengo yetu ya mapato,” imesema sehemu ya taarifa hiyo.
Aidha, uongozi wa hifadhi umeeleza kuwa mafanikio hayo ni matokeo ya ushirikiano mzuri kati ya wafanyakazi wa TANAPA, wadau wa utalii, na serikali kwa ujumla katika kulinda na kuendeleza rasilimali za maliasili nchini.
Serengeti, ambayo ni miongoni mwa hifadhi maarufu duniani, inaendelea kuwa kivutio kikuu cha utalii kutokana na mandhari yake ya kipekee na uhamaji wa wanyamapori, hususan nyumbu, jambo ambalo huvutia wageni kutoka mataifa mbalimbali.
Hifadhi hiyo inaahidi kuendelea kuboresha huduma na kuimarisha mikakati ya uhifadhi ili kuhakikisha mapato yanaongezeka zaidi kwa manufaa ya taifa.
