Afrika Kusini imelaani nia ya rais wa Marekani Donald Trump ya kuizuia nchi hiyo kuhudhuria Mkutano wa Kundi la 20 (G20) huko Miami, Florida, mwaka ujao.
Trump amesema kwamba hataialika Afrika Kusini kuhudhuria Mkutano wa G20 wa mwaka ujao.
Katika taarifa yake jana, Ikulu ya Afrika Kusini nchi ambayo ndiye mwenyekiti wa kundi la G20 hivi sasa imesema kuwa, inasikitisha kuona kwamba licha ya Rais Cyril Ramaphosa kufanya juhudi za kurejesha uhusiano na Washington, lakini Trump anaendelea kufanya kiburi na kuchukua hatua za kupuuza juhudi na nia njema Pretoria tena kwa kutegemea taarifa potofu na upotoshaji kuhusu Afrika Kusini.
“Rais Cyril Ramaphosa amesiktishwa na nia ya rais Donald Trump ya kuizuia Afrika Kusini kushiriki katika mikutano ya G20 ya 2026,” imesema taarifa hiyo.
Taarifa hiyo imesisitiza pia kwamba, Afrika Kusini itabaki kuwa “mwanachama kamili, hai na mwaminifu wa G20,” na kuwataka wanachama wa G20 kuthibitisha tena kujitolea kwao kwa pande nyingi na kufanya maamuzi yanayozingatia makubaliano ya pande zote, na kuhakikisha wanachama wote wanashiriki kwa usawa.
Marekani ilisusia mkutano wa kilele wa G20 wa mwaka huu uliofanyika nchini Afrika Kusini na haikutuma wawakilishi wake kwenye mkutano huo.
Katika kujibu jeuri hiyo ya Marekani, Vincent Magwenya, msemaji wa Rais Ramaphosa alisema kuwa Rais wa Afrika Kusini hatakabidhi urais wa G20 kwa afisa mdogo wa ubalozi wa Marekani. “Ni uvunjaji wa itifaki ambao hautakubaliwa au kuruhusiwa katika suala hili, alisema.”
The post Afrika Kusini Yalaani Hatua ya Trump Kutaka Kuiweka Kando Kutoka G20 2026 appeared first on Global Publishers.
