KIKOSI cha Yanga kimepangwa kundi C katika mashindano ya Kombe la Mapinduzi, yakitarajiwa kuanza rasmi Desemba 28, 2025 hadi Januari 13, 2026, huku macho ya mashabiki yakielekezwa kwenye ratiba ngumu inayowakabili mabingwa hao wa Tanzania Bara.
Katika mchezo wao wa kwanza, Yanga itashuka dimbani Januari 4, 2026 kuwakabili KVZ ya Zanzibar, mchezo unaotarajiwa kuwa na ushindani mkubwa kutokana na historia ya timu za Zanzibar kufanya vizuri wanapocheza nyumbani.
Michuano yote ya hatua za makundi itachezwa katika dimba la New Amaan Complex, Visiwani Zanzibar, uwanja unaotarajiwa kufurika mashabiki kutoka pande zote, huku fainali ya mashindano hayo ikipangwa kuchezwa katika Uwanja wa Gombani, Pemba.
Baada ya mchezo dhidi ya KVZ, Yanga itarejea tena uwanjani Januari 6, 2026 kwa mchezo wa pili dhidi ya TRA United (Tabora United), timu inayoshiriki Ligi Kuu Tanzania Bara na inayotajwa kuwa na kikosi chenye ushindani mkubwa msimu huu.
Kwa mujibu wa ratiba iliyotolewa na kamati ya mashindano ya Kombe la Mapinduzi, kundi C lina timu tatu ambazo ni Yanga, TRA United na KVZ, hali inayoashiria kuwa kila pointi itakuwa na umuhimu mkubwa katika mbio za kusonga mbele.
Mashindano ya Kombe la Mapinduzi hutumika kama jukwaa la maandalizi ya msimu mpya, hivyo Yanga inatarajiwa kuyatumia vizuri kuimarisha kikosi chake, kuwapa nafasi wachezaji wapya na kuonyesha dhamira ya kuanza mwaka 2026 kwa mafanikio.
The post YANGA YAPEWA MTIHANI MZITO MAPINDUZI appeared first on Soka La Bongo.
