Ni kweli mashabiki wengi wa Yanga SC wameanza kuonyesha wasiwasi mkubwa juu ya uwezo wa Romain Folz. Licha ya kupewa rasilimali zote muhimu, kama wachezaji bora, viwanja vya mazoezi na mazingira ya ushindani, bado timu haioneshi ubora wa kimfumo unaoendana na hadhi ya Wananchi.
Folz amekuwa akikumbwa na lawama kubwa juu ya playing style yake. Wapenzi wa Yanga wanatarajia kuona soka la kushambulia, pasi nyingi za uhakika na mpangilio wa kiufundi unaoleta matokeo. Badala yake, kikosi kimekuwa kikicheza bila mpangilio thabiti, mara nyingi kikiwa na makosa ya kiufundi, kushindwa kumiliki mpira na kushindwa kutumia nafasi wanazozipata. Hii inawafanya mashabiki kuamini kwamba kocha huyu ameshindwa kubadilika na hajui namna ya kutumia ubora wa kikosi kilichopo.
Katika mashindano ya ndani, Yanga inaweza bado kupata matokeo kutokana na ubora wa wachezaji binafsi na uzoefu wao. Hata hivyo, changamoto kubwa ipo kwenye michuano ya kimataifa kama CAF Champions League. Ili kutoboa makundi na kufika hatua za juu, timu inahitaji mbinu madhubuti, nidhamu ya kiufundi na falsafa ya wazi ya soka. Bila mabadiliko, matarajio ya wananchi kuona timu yao ikivuma barani Afrika yatabaki kuwa ndoto.
Hali hii inawaweka viongozi wa Yanga SC katika mtihani mkubwa. Ikiwa wataendelea kumvumilia Folz bila kuona mabadiliko ya haraka, basi hatari ya kushindwa kimataifa ni kubwa. Wakati mwingine ni busara kufanya maamuzi magumu mapema, kuliko kusubiri uharibifu mkubwa baadaye. Kwa mtazamo wa wengi, huu ndio wakati sahihi kwa Romain Folz kuondoka Jangwani ili kupisha kocha mwenye mbinu, falsafa na uzoefu wa kuifikisha Yanga kwenye malengo yake makubwa ya ndani na Afrika.
Yanga SC ni klabu kubwa yenye matarajio makubwa. Kwa mwenendo wa sasa, ni wazi kazi imemshinda Folz, na kama hatua hazitachukuliwa, mashabiki na viongozi watalazimika kukabiliana na msimu mgumu zaidi, hasa kwenye michuano ya CAF.
