MSANII Chidi Benz aliipeperusha bendera ya Rap ya Bongo kwa ustadi mkubwa. Alibadilisha sura ya muziki huo, akatoa mwelekeo mpya kwa vijana waliomfuata wengi wao wakiwa nyota wakubwa leo hii.
Lakini safari haikuwa nyepesi. Rashid Abdalla ‘Chidi Benz’ alitoweka kwenye ramani ya muziki kwa muda mrefu, akapotea machoni pa mashabiki wake. Hata hivyo, alibaki mioyoni mwetu kupitia kazi zake zilizobaki kuwa kumbukumbu hai.
Miaka imepita. Na sasa, Chidi Benz amerudi upya akiwa na afya, nguvu, na muonekano wa mtu aliyezaliwa mara ya pili. Hakurudi tu kama msanii, bali kama mtu aliyevuka milima ya changamoto na kutoka salama upande wa pili.
Kupitia utumbuizaji wake kwenye ufunguzi wa mashindano ya CHAN2024, Chidi Benz ametuma ujumbe wa matumaini. Anaonesha kuwa nyakati ngumu hazidumu, na kwamba bado inawezekana kurudi tena na kuendelea pale ulipoishia. Safari hii, anaonekana kuwa tayari zaidi kimwili, kiakili, na kiroho.
Kwa niaba ya vijana wote wanaopambana na makosa ya nyuma, wanaoanguka na kusimama tena, tunasema asante Chidi Benz. Tumepokea ujumbe wako, na tunajifunza kupitia mabadiliko yako.
The post Chidi Benz aamka tena first appeared on SpotiLEO.
