DAR ES SALAAM
KLABU ya Yanga imeweka wazi kuwa mshambuliaji wake Clement Mzize, bado ni sehemu ya kikosi chao, baada ya kuboresha maslahi ya mchezaji huyo.
Awali, kulikuwa na mvutano kukiwa na taarifa za mchezaji huyo kutakiwa na klabu za Misri, Morocco na Tunisia lakini hatimaye klabu hiyo imepambana kumbakisha baada ya kuboresha maslahi yake.
Yanga imeweka taarifa kwenye mtandao wake kuwa Clement Bado yupo sana ikionesha kumalizana naye.
“Bado yupo Sanaa,”ni ujumbe wa msisitizo kuwaondoa hofu mashabiki wa klabu hiyo juu ya kile kilichokuwa kinaendelea na kuondoa sintofahamu kuhusu uwezekano wa uhamisho wake kwenda klabu nyingine.
Clement Mzize, amekuwa mchezaji muhimu wa Yanga tangu alipojiunga rasmi na klabu hiyo mwaka 2022, akitokea katika akademi ya klabu. Kwa sasa, anavaa jezi namba 24 na amekuwa nguzo muhimu katika kikosi cha kwanza cha Yanga.
Katika msimu wa 2024/25 wa Ligi Kuu Tanzania Bara, Mzize alifunga jumla ya magoli 14, akisaidia Yanga kutetea ubingwa wao kwa msimu wa nne mfululizo.
Mzize pia ni mchezaji wa timu ya taifa ya Tanzania (Taifa Stars), ambapo amecheza mechi kadhaa tangu alipoitwa kwa mara ya kwanza mwaka 2023. Katika michuano ya CHAN 2024, aliisaidia timu yake kufanikisha mechi muhimu kwa kufunga magoli mawili katika mechi nne.
Ujumbe wa Mzize kupitia picha ya Yanga umeonesha mshikamanisho wake na klabu, na umewahakikishia mashabiki kuwa bado anajiunga kikamilifu na mipango ya klabu kuelekea msimu mpya wa 2025/26.
Kwa kasi yake, ari ya kupambana, na uwezo wake wa kufunga magoli muhimu, Clement Mzize anaendelea kuwa mchezaji muhimu na kipenzi cha mashabiki wa Yanga, akiwapa matumaini ya mafanikio makubwa zaidi katika mashindano ya ndani na ya kimataifa.
The post Yanga yamalizana na Clement Mzize first appeared on SpotiLEO.
