UONGOZI wa klabu ya Yanga) chini ya Rais wake, Hersi Said, upo katika hatua za mwisho za kukamilisha usajili wa mshambuliaji kutoka Angola, Laurindo Dilson Maria Aurélio maarufu kama Depú, katika dirisha dogo la usajili linaloendelea.
Hatua hiyo inaelezwa kuwa sehemu ya mkakati mpana wa klabu hiyo kuimarisha kikosi chake kuelekea mashindano yajayo ya ndani na kimataifa, ikiwa ni jitihada za kuhakikisha Yanga inaendelea kuwa na ushindani wa juu katika ngazi zote.
Taarifa kutoka ndani ya klabu zinaeleza kuwa mazungumzo kati ya Yanga na wahusika wa mchezaji huyo yamekuwa yakiendelea kwa wiki kadhaa, huku kwa sasa yakifikia hatua ya juu ambapo makubaliano ya mwisho yanatarajiwa kufikiwa muda wowote kuanzia sasa.
Jina la Depú limekuwa likitajwa mara kwa mara ndani ya kambi ya Yanga kutokana na uwezo wake mkubwa wa kufumania nyavu, jambo lililomfanya kuwa miongoni mwa washambuliaji waliokuwa wakifuatiliwa kwa karibu na benchi la ufundi la klabu hiyo.
Kocha Mkuu wa Yanga, Pedro Gonçalves, ambaye aliwahi kuinoa timu ya taifa ya Angola, ametajwa kuwa na mchango mkubwa katika kusukuma mbele usajili huo, akitumia uzoefu wake binafsi pamoja na ufahamu wa kina kuhusu kiwango, uwezo na tabia za mchezaji huyo uwanjani.
Uongozi wa Yanga unaamini kuwa endapo Depú atasajiliwa, ataongeza ushindani mkubwa ndani ya kikosi hususan katika safu ya ushambuliaji, hali itakayotoa chaguo pana zaidi kwa benchi la ufundi katika mechi zenye ushindani mkubwa.
Iwapo dili hilo litakamilika kama inavyotarajiwa, usajili wa Depú utakuwa ni ujumbe mzito kwa wapinzani wa Yanga, ukionyesha wazi dhamira ya klabu hiyo kuendelea kujijenga kama moja ya nguvu kubwa ya soka, si tu ndani ya Tanzania bali pia katika anga za kimataifa.
The post MSHAMBULIAJI KUTOKA ANGOLA NDANI YA JANGWANI appeared first on Soka La Bongo.
