KLABU ya Simba SC imeingia rasmi katika mazungumzo ya kumsajili beki wa kati wa Asante Kotoko ya Ghana, Samba O’Neil Ndongani, katika harakati za kuimarisha safu yake ya ulinzi kuelekea michuano ijayo ya ndani na kimataifa.
Taarifa zinaeleza kuwa uongozi wa Simba umeanza mawasiliano ya awali na wawakilishi wa mchezaji huyo pamoja na klabu yake, Asante Kotoko, ili kuona uwezekano wa kukamilisha dili hilo mapema kabla ya kufungwa kwa dirisha la usajili.
Ndongani, ni raia wa Congo, amejijengea jina kubwa ndani ya Ligi Kuu ya Ghana kutokana na uimara wake, uwezo wa kukaba na kusoma mchezo kwa haraka, sifa ambazo zimevutia macho ya makocha na maskauti wa Simba.
Hata hivyo, Simba haitakuwa peke yake katika mbio za kumnasa beki huyo, kwani klabu ya Azam FC pia imeripotiwa kuonyesha nia ya kumsajili mchezaji huyo, jambo linalofanya ushindani wa kupata saini yake kuwa mkali zaidi.
Chanzo cha ndani kimeeleza kuwa Simba inaendelea kupima vigezo vya kifedha na kiufundi kabla ya kufikia uamuzi wa mwisho, huku ikihakikisha usajili huo unaendana na mahitaji ya benchi la ufundi la timu hiyo.
Kwa sasa, mazungumzo bado yanaendelea na pande zote zinatarajiwa kufikia makubaliano hivi karibuni endapo hakuna kikwazo kipya kitakachojitokeza, jambo linalowafanya mashabiki wa Wekundu wa Msimbazi kusubiri kwa hamu hatma ya dili hilo.
The post SIMBA YAMVIZIA BEKI WA ASANTE KATOKO appeared first on Soka La Bongo.
