Arusha, Machi 2025 – Tanzania imeendelea kujidhihirisha kama kinara wa kimataifa katika sekta ya madini kwa kuwa mwenyeji wa Mkutano wa 62 wa Bodi ya Kimataifa ya Uwazi na Uwajibikaji katika Sekta ya Madini (EITI), uliofanyika jijini Arusha.
Mkutano huo uliwaleta pamoja viongozi wa serikali, wadau wa sekta binafsi, na wawakilishi wa jamii kwa lengo la kujadili mbinu bora za kuhakikisha uwazi, uwajibikaji, na maendeleo endelevu katika sekta ya madini.
Mada kuu ya mkutano huo ilikuwa “Uchimbaji wa Madini kwa Maendeleo Endelevu”, ambapo washiriki walisisitiza umuhimu wa kuhakikisha kuwa rasilimali za madini zinanufaisha wananchi na kulinda mazingira badala ya kuwa chanzo cha changamoto.
Miongoni mwa wadhamini wakuu wa mkutano huo ilikuwa AngloGold Ashanti Tanzania, kampuni inayojipambanua kwa kuchangia maendeleo ya jamii kupitia miradi yake ya kijamii na kimazingira. Kupitia uwekezaji wake, kampuni hiyo imeonyesha kuwa uchimbaji wa madini unaweza kuwa nguzo ya ustawi wa jamii na maendeleo endelevu.
Makamu wa Rais wa Uendelevu na Masuala ya Biashara wa AngloGold Ashanti Afrika, Simon Shayo, alisema kuwa kampuni hiyo inawekeza katika uchimbaji wa madini unaolenga kuwezesha jamii.
“Tunachimba madini si kwa ajili ya faida pekee, bali kwa ajili ya maendeleo ya watu. Tunazingatia uwazi, uwajibikaji, na ustawi wa jamii zinazozunguka migodi yetu,” alisema Shayo.
AngloGold Ashanti imeendelea kuwekeza katika miradi kama ujenzi wa shule, vituo vya afya, na miradi ya kilimo endelevu, huku ikizingatia viwango vya uwazi vya EITI katika shughuli zake.
Tanzania ilichaguliwa kuwa mwenyeji wa mkutano huo kutokana na juhudi zake katika kuboresha uwazi na usimamizi wa rasilimali za madini. Helen Clark, Waziri Mkuu wa zamani wa New Zealand na mtetezi wa maendeleo endelevu, alisifu hatua za Tanzania katika kuhakikisha kuwa mapato ya madini yanawanufaisha wananchi.
Waziri wa Madini, Mhe. Anthony Mavunde, alisema kuwa mkutano huo ulikuwa fursa adhimu ya kubadilishana uzoefu na mataifa mengine.
“Tunashukuru EITI kwa kutuamini. Tanzania imepiga hatua kubwa katika kuhakikisha uwazi katika sekta ya madini, na tunajivunia kuwa mfano kwa nchi nyingine,” alisema Mavunde.
Mkutano huo ulijadili changamoto zinazoikabili sekta ya madini, ikiwemo usimamizi wa mapato, ulinzi wa mazingira, na ushirikishwaji wa jamii katika shughuli za uchimbaji. Washiriki walikubaliana kuwa kampuni za madini hazipaswi kuangalia faida tu, bali zinapaswa kuchangia maendeleo ya jamii zinazozunguka migodi yao.
Serikali ya Tanzania imepiga hatua kubwa katika kurekebisha sekta ya madini kwa kuanzisha sheria mpya zinazolinda maslahi ya wananchi. Hata hivyo, bado kuna changamoto za kuhakikisha kuwa mapato kutoka sekta hiyo yanawafikia wananchi wa kawaida kwa njia inayogusa maisha yao moja kwa moja.
Mkutano wa 62 wa Bodi ya EITI ulimazilika kwa matumaini makubwa na ahadi za kushirikiana ili kuhakikisha sekta ya madini inakuwa chanzo cha maendeleo endelevu.
Kwa kushirikiana na mashirika kama EITI na kampuni zinazojali maendeleo kama AngloGold Ashanti, Tanzania ina nafasi ya kuendelea kuwa kinara wa uwazi na uwajibikaji katika sekta ya madini barani Afrika.
Katika maneno ya Waziri Mavunde, “Tunajenga msingi wa sekta ya madini inayozingatia si tu faida, bali pia maendeleo ya watu na mazingira.” Huu ni wakati wa Tanzania kuongoza kwa mfano na kuhakikisha rasilimali zake zinakuwa baraka kwa wote.
