HALI si shwari ndani ya Simba kutokana na sintofahamu iliyojitokeza ikiwamo vigogo wa klabu hiyo kunyoosheana vidole ikiwa zimesalia saa kadhaa tu kabla ya kufanyika kwa mkutano mkuu Jumapili hii kwenye Ukumbi wa Diamond Jubilee, jijini Dar es Salaam.
Simba itafanya mkutano huo wa kikatiba ambapo wanachama wa klabu hiyo watajadili kuhusu mustakabali wa timu hiyo kuanzia saa 2:00 asubuhi, hususani marekebisho ya katiba mpya.
Hata hivyo, kumekuwa na vita kubwa mtandaoni kutoka makundi mawili tofauti ya klabu hiyo, kundi moja likionekana kuwa upande wa Mwekezaji na bilionea wa klabu hiyo, Mohammed Dewji na jingine la wanachama la upande wa Mwenyekiti wa Simba, Murtaza Mangungu.
Inadaiwa, vita kubwa ya makundi hayo ni baadhi ya ajenda zinazoenda kujadiliwa katika mkutano huo, yakiwamo mabadiliko makubwa ya katiba yanayoweza kuliondoa kundi moja kwenye usimamizi wa jumla wa klabu hiyo.
Ajenda ya mabadiliko ya katiba ndio inayoonekana vita kubwa, kwani kama ikipita inaonyesha kutakuwa na mabadiliko makubwa ya kiundeshaji klabuni na inaelezwa imesababisha aliyekuwa Ofisa Mtendaji Mkuu, Zubeda Sakuru kuongezewa mkataba mpya kimyakimya kabla ya mkutano huo ili kuliunga mkono kundi mojawapo.
“Mtendaji kapewa mkataba na bodi hatufahamu, lakini inaonekana, ili aweze kuliunga mkono kundi mojawapo ambalo lina jambo lake katika mkutano mkuu wa Jumapili, sidhani kama ni sawa kwa sasa, Simba inahitaji watu wenye umoja kwani kuna mambo mengi ya kufanya, subiri tuone itakavyokuwa mkutanoni, ila mambo hayatakuwa rahisi,” mmoja wa wajumbe wa Bodi ya Simba alisema.
Akizungumza na kituo cha Redio cha Crown, Mwenyekiti wa Bodi ya Wakurugenzi wa Simba, Crescentius Magori, alisema kuna watu wapo nje ya Simba wasioitakia mema klabu hiyo wakitaka kufanya fujo katika mkutano mkuu ujao.
“Kuna kundi lipo nje ya Simba ndio linaleta hizi chokochoko, watu walishaongoza muda wao umemalizika, wanachotakiwa ni kuiunga mkono timu sio kufurahia timu ikiwa haifanyi vizuri.
“Huwezi kuamini watu wanafurahi Simba ikipoteza mechi, juzi wamecheka sana tulipofungwa na walishakuwa viongozi wa timu huko nyuma, hii si sawa hata kidogo, wakati nilipomaliza uongozi wangu nilikuwa hadi nagombana na watu kuhakikisha Simba inafanya vizuri,” alisema Magori.
KITAKACHOJADILIWA
Pamoja na mambo mengi yanayotarajiwa kujadiliwa katika mkutano mkuu wa Simba, chanzo cha ndani kimesema kuwa kuna fukuto kubwa lipo kwenye vipengele vya katiba vinavyotakiwa kupitishwa na mkutano huo vinavyoweza kubadilisha mwenendo mzima wa klabu hiyo.
Chanzo hicho ambacho kipo ndani ya bodi kinasema kama vipengele hivyo vitapita basi upande wa mwekezaji utakuwa hauna nguvu tena klabuni hapo na kila kitu kitaendeshwa na upande wa wanachama.
“Unajua kwa utaratibu wanachama wana asilimia 51 na hawa kisheria ndio wanatakiwa kutoa Mwenyekiti wa Bodi ya Wakurugenzi, lakini hapo nyuma kwa kipindi chote mwenyekiti alikuwa anatoka upande wa mwekezaji ambao wana asilimia 49,” kilisema chanzo hicho na kuongeza;
“Sasa kuna kipengele katika katiba kinachoatakiwa kupitishwa kuwa upande wa wanachama ndio unatakiwa kutoa kiongozi wa bodi, hivyo timu iwe inaendeshwa upande wa wanachama,” kilisema chanzo hicho cha uhakika.
Alisema jambo jingine linaloonekana litakuwa na mvutano mkubwa mkutanoni ni kipengele katika katiba kinachotaka timu hiyo iwe na wawekezaji na sio mwekezaji kama ilivyo sasa.
“Katiba pia inataka wawekezaji na sio mwekezaji kama ilivyo sasa, hii ina maana kuwa hisa asilimia 49 ambazo kwa sasa zinaonekana kumilikiwa na mtu mmoja, zigawanywe kwa wengi, kama kuna atakayekuwa na hisa tano, mwingine 10 na mwingine 20 sawa, lakini asiwe mtu mmoja,” kilisisitiza chanzo hicho na kuongeza; “Hili nalo linaonekana linawagawa wajumbe na wanachama kwani wengine wanaamini mwekezaji wa sasa anafanya vizuri, lakini wengine wanaamini wakiwa wengi watafanya vizuri zaidi hapa ndio shida nyingine ilipo.”
Inaelezwa kipengele cha tatu ambacho kipo kwenye katiba hiyo ni kuwa na Kamati ya Utendaji badala ya Bodi ya Wakurugenzi kwani mchakato wa uwekezaji bado haujapita, jambo jingine ambalo linawagawa wanachama hai wa timu hiyo.
HASSANOO AKAZIA
Akizungumza jijini Dar es Salaam, aliyekuwa Katibu wa Simba, Hassan Othman ‘Hassanoo’ alisema anaamini kisheria upande wa wanachama ndio unatakiwa kuendesha klabu hiyo kwa mujibu wa sheria.
“Kuna upotoshaji mkubwa unafanyika, lakini hiki kitu kinachoitwa uwekezaji serikali ilishakifuta muda mrefu, hakuna bodi ya pande mbili Simba, mimi naunga mkono asilimia zote wanachama kuendesha klabu.”
Kama itakuwa hivyo, ina maana wajumbe watakaoongoza klabu hiyo watatoka upande wa wanachama tu na hakutakuwa na wajumbe wanane wa mwekezaji, hivyo Magori na wanzake walioteuliwa na Mo Dewji hawatakuwa na mamlaka yakuwamo klabuni hapo kama viongozi.
The post KUELEKEA MKUTANO MKUU SIMBA KESHO….HALI SI HALI….MO DEWJI AWEKWA MTU KATI….. appeared first on Soka La Bongo.
