KIKOSI cha Simba usiku wa kesho Jumapili kitakuwa uwanjani mjini Bamako, Mali, kupepetana na Stade Malien, lakini mapema nyumbani Tanzania kuna mageuzi makubwa yanayotarajiwa kufanyika kupitia mkutano mkuu utakaofanyika ukumbi wa Diamond Jubilee, Dar es Salaam.
Ndio, wanachama wa Simba kesho kuanzia saa 2:00 asubuhi watakuwa na jambo lao kwenye mkutano huo mkuu utakaokuwa na ajenda 11 ikiwamo marekebisho ya katiba, ambapo kama yatapitiswa yataleta mageuzi makubwa katika uendeshaji wa klabu hiyo tofauti na ilivyo sasa.
Kwa sasa Simba inajinasibishwa kuendeshwa kwa mfumo wa hisa, lakini kuna mambo yanaenda sivyo ndivyo ikiwemo upande wa mwekezaji wenye hisa asilimia 49 kuwa na nguvu kubwa kuliko ule wa wanachama wenye kumiliki asimilia 51, kitu ambacho kesho mambo yanakwenda kusawazishwa.
Agizo za Baraza la Michezo la Taifa (BMT), kupitia Msajili wa Vyama vya Michezo na Klabu kutaka pia katiba itambue wawakezaji badala ya mwekezaji huenda ikatoa hatma ya bilionea wa sasa wa Simba, Mohammed Dewji aliye na sauti kubwa klabuni kuliko mwenyekiti, Murtaza Mangungu.
Kuondolewa kwa nguvu na sauti kwa mwekezaji wa sasa itakuwa na maana kwamba hata mwenyekiti wa Bodi ya Wakurugenzi wa klabu hiyo inayoshikiliwa kwa sasa na Crescentius Magori aliyeteuliwa na Mo Dewji itaondoka kwa upande huo ili mwenyekiti wa Simba aiongoze klabu hiyo kulingana na maagizo ya BMT yaliyosainiwa na msajili wa Vyama vya Michezo na Klabu, Abel Ngilangwa, Oktoba 28, mwaka huu.
AGIZO LA BMT
– Serikali kupitia BMT imetoa maelekezo katiba mpya ya Simba inapaswa kumtambua mwenyekiti wa klabu kuwa ndiye mwenyekiti wa Bodi ya Wakurugenzi maana klabu ina umiliki mkubwa (51%) na wawekezaji (49%).
– Serikali imetaka katiba ifanyiwe maboresho ya kutamka bayana kuwa mwenyekiti wa Simba SC ndiye kiongozi mkuu wa chombo cha utawala ndani ya klabu na hivyo awe na mamlaka ya kuitisha mkutano mkuu wa wanachama kwa kuwa masuala yanayojadiliwa juu ya uanachama na maendeleo ya klabu yanaathiri moja kwa moja maslahi ya wanachama.
– Mwenyekiti wa klabu huyo ndiye awe mwenyekiti wa Bodi ya Wakurugenzi ya Simba Sports Club Company Limited kwa kuzingatia kuwa wanachama kupitia klabu ndio wenye umiliki wa hisa nyingi (51%), hivyo viongozi wote walio chini ya katiba ya klabu watawajibika kwake katika kutekeleza majukumu yao kwa mujibu wa sheria, katiba na kanuni zinazoongoza klabu.
– Serikali pia imetaka kurekebishwa kwa matumizi ya neno ‘mwekezaji’ ndani ya rasimu ya katiba na badala yake itumike dhana pana ya “wawekezaji” na iweke bayana kuwa Baraza la Wadhamini kwa niaba ya wanachama, ndilo litakaloingia mikataba na makubaliano yoyote na wawekezaji.
– Marekebisho haya yanakusudia kupanua wigo wa uwekezaji wa kibiashara ndani ya klabu kwa maendeleo ya klabu na ulinzi wa maslahi ya wanachama kama wamiliki halali wa Simba Sports Club.
HALI ILIVYO
Masharti hayo yameibua sintofahamu huku baadhi ya vigogo wa juu wa klabu hiyo na wanachama wakongwe wakianza kunyoosheana vidole wakipishana mitazamo.
Mwenyekiti wa Tawi la Mpira Pesa na Mjumbe wa Kamati ya Katiba ya Simba, Ustadh Masoud alisema katika mkutano wa Jumapili ajenda yao namba moja itakuwa ni kufuata maelekezo yote waliyopewa na serikali ambayo kila mwaka wamekuwa wakiyapokea na kushindwa kuyafanyia kazi hivyo kuendelea kuwanufaisha watu wachache.
“Kuna maelekezo ya serikali tuliyokuwa nayo na yalikuwa hayafanyiwi kazi mfano upande wa uwekezaji wanatakiwa wawe watatu, eneo lingine ni mwenyekiti wa bodi anatakiwa kutoka upande wa wanachama haya yanatakiwa kufanyiwa kazi kwa kufuata taratibu,” alisema Ustadh na kuongeza:
“Kukaidi kwetu serikali inaweza ikaifuta klabu kama makanisa yanavyofutwa masuala ya msingi yanayotokana na kanuni na katiba zinatakiwa kufuatwa, kwenye mpira mambo ya katiba za mpira zina maeneo mawili makuu moja mpira nyingine mamlaka za serikali.”
Ustadh alisema kuna watu wanakurupuka kuwa serikali haitakiwi kuingilia masuala ya michezo wanatakiwa kuulizwa ni kwenye eneo lipi, “mbona uwanja unatumika wa serikali unapozungumzia uwekezaji ni upande wa serikali.”
Akizungumzia ajenda kuelekea mkutano mkuu, alisema wamezipata na wameanza kuzipitia kufahamu kama maelekezo waliyopewa na serikali yapo kwani kila mwaka wamekuwa wakipewa, lakini hawafanyii kazi.
“Serikali miaka yote inatuelekeza kwa barua, lakini hatufuati na tusipofuata inakuwa ni kuwanufaisha watu wachache ambao hawapo upande wa serikali, kwa maelekezo hayo mkutano ujao ajenda namba moja itakuwa kufuata maelekezo ya serikali,” alisema Ustadh na kuongeza:
“Lazima tufuate maagizo na sio mawazo yetu sisi na kuiacha ajenda hii ni kama tumeyatupa mawazo ya serikali pembeni na unavyoitupa serikali pembeni na kwenda kuiomba ikukamilishie mchakato unategemea nini.’’
Kuhusu marekebisho ya katiba alisema ndio hayo hayo ambayo yanatokana na mapendekezo ya serikali, pia alitolea ufafanuzi juu ya mwekezaji, Mohamed Dewji (maarufu kama Mo) kuondoka katika nafasi yake alisema maagizo waliyopewa hakuna sehemu kunazungumzia kumuondoa zaidi ya kuongeza idadi ya wawekezaji.
“Mo ataendelea kuwepo kama mwekezaji namba moja, lakini kwa uwekezaji wake wa bilioni 20 kwa miaka mitano iliyopita kutaweza kukawa na ongezeko hadi Sh 50 bilioni na mwekezaji wa pili na wa tatu wote wakija na kiasi hicho timu inaweza kufanya usajili wa maana na kuingia kwenye timu zinazotwaa mataji ya Afrika.”
MSIKIE MANGUNGU
Wakati Masoud akiyazungumza hayo, Mwenyekiti wa Simba, Murtaza Mangungu alisema hajayaona maelekezo kutoka BMT inawezekana yakawa yamefika, lakini yeye hajayaona ila watayafanyia kazi kutokana na uhitaji kwa wakati sahihi utakavyohitajika.
“Tutayapokea maelekezo hayo na kuyafanyia kazi kama itakavyotakiwa yakifika, lakini suala linalohusu uendeshaji wa timu au namna ya ushirikishwaji wa uwekezaji na Simba halizungumzwi kwenye mkutano mkuu, hilo jambo halipo kwenye mkutano mkuu.”
Kwa upande wa msajili, Alex Ngilangwa alisema jukumu la wanachama wa Simba ni kuhakikisha kila watakaloliamua kupitia mkutano wao linaendana na sheria na kanuni za nchi na sio kama wanashinikiza jambo na kufanya.
“Jukumu lote lipo kwa wanachama, sisi kazi yetu ni kuhakikisha vyama na klabu zinatekeleza mambo kwa misingi ya sheria, taratibu na kanuni zilizopo nchini,” alisema Ngilangwa alipozungumza na Mwanaspoti jana ofisini Dar es Salaam.
HATMA YA MO
Wakati hayo yakiibuka presha inakuja juu ya hatma ya MO Dewji ndani ya Simba ikielezwa kwamba masharti hayo sio kitu ambacho anakikubali bilionea huyo anayetambulika pia kama rais wa heshima wa klabu hiyo kongwe iliyoasisiwa mwaka 1936.
Ingawa bado MO hajatoa msimamo, lakini taarifa kutoka kwa wajumbe wa Bodi ya Simba waliopo upande wake, wanaona masharti hayo yatakuwa ni vigumu kwa tajiri huyo kukubaliana nayo, akiona kama kuna watu ndani ya Simba wanasukuma kukwamisha mchakato huo.
Mo Dewji ndiye amekuwa akiifadhili klabu hiyo kuanzia ishu za usajili na hata gharama za uendeshaji akishirikiana na wadhamini na vigogo wengine wenye fedha zao, lakini yeye akiwa na sauti kubwa na kuheshimika zaidi kulinganisha na viongozi wengine wa klabu hiyo.
Ndani ya bodi hiyo kumeibuka kunyoosheana vidole kwa baadhi ya wajumbe wa mamlaka hiyo huku wengine wakitajwa viongozi wa zamani wa Simba ambao hawapo madarakani kwa sasa kuwa ndio wanasuka sintofahamu hiyo.
AJENDA 11
Kwa mujibu wa taarifa iliyotolewa na Kaimu Mkurugenzi wa Wanachama na Mashabiki wa Simba, Hamis Kisiwa ni kwamba mkutano wa kesho uloitishwa kwa mujibu wa Ibara ya 22 ya katiba ya Simba ya mwaka 2018 iliyofanyiwa maerekebisho 2024 utakuwa na ajenda 11
Kuhakiki idada ya wanachama watakaohudhuria mkutano, kuthibitisha ajenda, kuthibitisha kumbukumbu za mkutano uliopita, yatokanyo na kumbukumbu ya mkutano uliopita, hotuba ya mwenyekiti, kupokea na kujadili taarifa ya utendaji kutoka Bodi ya Wakurugenzi, kupotea taarifa za hesabu za fedha zilizokaguliwa kwa mwaka uliopita ya klabu ya Simba na Kampuni ya Simba, kupokea bajeti ya mwaka ya shughuli na mipango ya Klabu ya Simba na Kampuni ya Simba, uchaguizi wa nafasi zozote zilizo wazi Simba na Kampuni ya Simba, kupokea na kujadili mapendekezo ya marekebisho ya kanuni na katiba ya Simba na mwisho itakuwa ni kujadili mapendekzo yaliyowasilishwa na wanachama au Bodi ya Wakurugenzi.
The post WAKATI TIMU IKIWA MALI …..HIZI HAPA AGENDA 11 ZA MKUTANO WA SIMBA KESHO….MO NDANI… appeared first on Soka La Bongo.
