Wakala wa Ufundi na Umeme Tanzania (TEMESA) umetangaza kuwa Kivuko MV. KILINDONI, kinachotoa huduma kati ya Mafia (Wilayani Mafia) na Nyamisati (Wilayani Kibiti, Mkoa wa Pwani), kitasitisha huduma zake kuanzia leo tarehe 12 Februari 2025. Hatua hii inalenga kuruhusu matengenezo makubwa pamoja na kufungwa injini mpya kwa ajili ya kuboresha ufanisi na usalama wa kivuko hicho.
Kivuko hicho kimewasili leo Nyamisati kikiwa na abiria na mizigo kikitokea Mafia, kabla ya kuanza safari ya kuelekea Dar es Salaam, ambako matengenezo hayo yatafanyika kwa muda wa takriban wiki moja. TEMESA imesisitiza kuwa hatua hii inalenga kuhakikisha kuwa huduma za kivuko hicho zinarejea zikiwa bora zaidi kwa abiria na watumiaji wake.
Wakala huo umeomba radhi kwa usumbufu ambao unaweza kuwapata abiria wakati wa kipindi hiki cha ukosefu wa huduma, huku ukiahidi kuwa matengenezo haya yataleta maboresho ya kudumu kwa usalama na ufanisi wa usafiri kati ya maeneo hayo mawili muhimu.
