Baada ya kumalizika kwa tamasha kubwa la Simba Day lililofanyika tarehe 10 Septemba 2025, shabiki maarufu wa Simba SC, Mzee Shaaban Kamwe, ambaye pia ni baba mzazi wa msemaji wa Yanga SC, Ally Shaaban Kamwe, alitoa maoni yake juu ya mwenendo wa timu yake. Akizungumza kwa hisia, Mzee Kamwe alieleza changamoto anazoziona ndani ya kikosi cha Simba na kutoa tahadhari kwa benchi la ufundi pamoja na wachezaji.
Moja ya hoja zake kuu ilikuwa ni kuhusu mchezaji Jonathan Sowah, ambaye kwa sasa anaonekana kutopewa nafasi ya kuchezeshwa ipasavyo na wachezaji wenzake, tofauti na alipokuwa Singida Fountain Gate. Mzee Kamwe alisisitiza kuwa mchezaji huyo ana uwezo mkubwa lakini anahitaji kuaminiwa na kushirikishwa zaidi katika mfumo wa uchezaji wa Simba.
Aidha, alionekana kuvutiwa na kiwango cha beki mpya namba tano kutoka Afrika Kusini, akisema kuwa ameonesha ubora mkubwa na anaweza kuwa nguzo muhimu ya safu ya ulinzi ya klabu hiyo msimu huu. Hata hivyo, licha ya pongezi hizo, Mzee Kamwe hakuacha kukosoa.
Alisema wazi kwamba Simba walicheza chini ya kiwango katika mchezo huo wa maandalizi (kirafiki), jambo ambalo likiendelea linaweza kuiletea timu madhara makubwa, hususan pale watakapokutana na watani wao wa jadi, Yanga SC. Kwa mtazamo wake, kama hali hiyo haitarekebishwa mapema, basi Simba watakuwa na wakati mgumu dhidi ya mahasimu wao na wataufungwa kama kawaida.
Mzee Kamwe alihitimisha kwa kuwataka wachezaji kuongeza bidii na mshikamano ili kulinda heshima ya Simba na kuendeleza historia ya klabu hiyo kubwa barani Afrika.
