YANGA jana Ijumaa Novemba 28, 2025 imeokota pointi moja ugenini mbele ya JS Kabylie pale Algeria, katika ardhi ambayo ilikwenda mara mbili mfululizo na kuambulia vichapo kabla ya juzi kuwakazia Waarabu.
Mabingwa hao wa kihistoria wa Ligi Kuu Bara na wawakilishi wa Tanzania katika Ligi ya Mabingwa Afrika msimu huu, wamekusanya pointi nne katika mechi mbili za Kundi B, linaloongozwa na Al Ahly ambayo nayo inazo nne, huku AS FAR Rabat na JS Kabylie zina moja kila moja zikifuatia katika nafasi ya tatu na ya nne.
Wakati Yanga inarejea Dar na pointi moja kutoka Algeria, kipa namba moja wa kikosi hicho, Djigui Diarra ametajwa kuwa shujaa katika mechi hiyo.
Hayo yamesemwa na kocha mkuu wa Yanga, Pedro Goncalves, huku akifichua kile walichomwambia wakati wa mapumziko hali iliyofanya kuondoka uwanjani kwa kicheko.
“Wakati wa mapumziko tulikuwa na hali fulani, pia tulikuwa na jambo likimuhusu Djigui. Tukamwambia ‘pambana, lazima uwe shujaa. Lazima tukabiliane na hali hii’ kwa kweli alitoa kiwango kikubwa sana.
“Ametoa kila kitu kuhakikisha lango linabaki salama bila kuruhusu bao. Kwa hiyo nina furaha sana, kwa sababu tulihitaji hilo pia. Tulianza vizuri tukicheza soka safi uwanjani kote, na mwishowe wakati mwingine unahitaji kuwa kama askari vitani ili kupata pointi. Na leo (jana) tumefanya kazi nzuri sana kwenye hilo,” amesema Pedro, raia wa Ureno, muda mfupi baada ya mechi hiyo iliyochezeshwa na mwamuzi Ahmad Heeralall kutoka Mauritius.
Baada ya mechi hiyo dhidi ya JS Kabylie, Diarra amefikisha clean sheet tano katika mechi sita za Ligi ya Mabingwa Afrika msimu huu.
Mechi pekee ambayo Diarra aliruhusu bao, ilikuwa ya ugenini dhidi ya Silver Strikers ya Malawi katika hatua ya pili kuwania kufuzu makundi wakati Yanga ikifungwa 1-0. Mechi nyingine alizodaka bila ya kuruhusu bao msimu huu zipo hivi; Wiliete 0–3 Yanga, Yanga 2–0 Wiliete, Yanga 2–0 Silver Strikers, Yanga 1-0 AS FAR Rabat na JS Kabylie 0-0 Yanga.
Hadi kufikia sasa, Diarra amefikisha mechi 32 za Ligi ya Mabingwa Afrika huku akiwa na cleansheets 19 katika michuano hiyo akiwa na jezi ya Yanga tangu atue Agosti 2021 akitokea Stade Malien ya kwao Mali.
Kipa huyo wa timu ya taifa ya Mali, alianza kucheza Ligi ya Mabingwa msimu wa 2015 akiwa na Stade Malien dhidi ya TP Mazembe.
Akiwa Stade Malien, Diarra alicheza mechi kumi za Ligi ya Mabingwa kabla ya kutua Yanga alipo sasa huu ukiwa ni msimu wa tano Jangwani.
WALICHOKUTANA NACHO ALGERIA
Kabla ya juzi kutoka 0-0 na JS Kabylie, Yanga ilikwenda hapo mara mbili katika michuano ya CAF na kupasuka zote. Novemba 24, 2023 ilikutana na kichapo cha mabao 3-0 kutoka kwa CR Belouizdad ikiwa ni hatua ya makundi Ligi ya Mabingwa Afrika, kisha Desemba 7, 2024, ikafungwa 2-0 na MC Alger ikiwa pia ni hatua ya makundi Ligi ya Mabingwa.
Mara ya mwisho kwenda Algeria na kurudi na ushindi ilikuwa Juni 3, 2023 katika fainali ya Kombe la Shirikisho Afrika dhidi ya USM Alger iliposhinda 1-0, hata hivyo ushindi huo haukuipa ubingwa baada ya nyumbani kufungwa 2-1 nyumbani na kupoteza taji kwa kanuni ya bao la ugenini.
Akizungumzia hali ilivyokuwa mechi ya juzi, kocha Pedro amesema: “Tulikuja hapa kupambana na kutafuta pointi tatu. Tulicheza kwa malengo hayo. Katika kipindi cha kwanza tulitoa kiwango kizuri sana. Ni kweli wakati mwingine JS Kabylie walimiliki mpira na kutupa presha, lakini tulikuwa vizuri kwenye kupokonya mpira kwa presha ya juu na kuunda nafasi kubwa dhidi yao.”
Pedro amezungumzia mabadiliko aliyoyafanya wakati kipindi cha pili kinaanza akimtoa Mudathir Yahya na kuingia Mohamed Doumbia.
“Kipindi cha pili baada ya kufanya mabadiliko ya kumtoa Mudathir, pengine tukakosa aina ya mchezaji kama yeye katika eneo lile. Doumbia ni mchezaji mzuri, lakini si sawa kabisa na Mudathir kwenye majukumu yale, kwa hiyo hatukuwa na ufanisi ule ule kwenye kufanya presha. Na katika mazingira yale, pamoja na presha kutoka kwa mashabiki, hata marefa wakati mwingine walikuwa wanatusukuma kurudi nyuma kwa maamuzi yao. Lakini tuliendelea kuwa makini tukitafuta bao.
“Jambo muhimu ni kwamba tumepata angalau pointi moja na bado tuko kwenye mbio za kutafuta pointi za kutosha kuvuka hatua ya makundi,” amesema kocha huyo.
Yanga baada ya kucheza mechi mbili na kukusanya pointi nne, itasubiri hadi Januari 2026 kucheza dhidi ya Al Ahly ikianzia ugenini kisha nyumbani. Baada ya hapo, itaifuata AS FAR Rabat, kisha itaikaribisha JS Kabylie, mechi hizi zikichezwa mwezi Februari 2026.
The post WAARABU WABAKI ‘MACHO KODO’ KWA DIARRA….SHUJAA WA ‘SHOW’ HUYU HAPA…. appeared first on Soka La Bongo.
