DAR ES SALAAM: MSANII wa muziki wa Bongo Fleva, Rajab Abdul maarufu Harmonize, na mpenzi wake Frida Kajala, wamezua gumzo kubwa baada ya kurudiana tena na kuvishana pete ya uchumba kwa mara ya pili, hatua iliyorejesha matumaini mapya kwa mashabiki wao.
Harmonize na Kajala waliwahi kuvishana pete ya uchumba mwaka 2022, lakini kabla ya kufikia hatua ya ndoa walitengana, jambo lililowaacha mashabiki na maswali mengi.
Safari hii, wawili hao wameonekana kurejea kwa nguvu mpya, huku Harmonize akimvisha Kajala pete tena jana Desemba 29, 2025, hatua inayotafsiriwa kama ishara ya dhamira ya dhati.
Hatua hiyo imeibua mjadala mpana miongoni mwa Watanzania, wengi wakijiuliza kama ni sahihi kwa Harmonize kumvisha pete tena Kajala baada ya historia yao ya awali.
Hata hivyo, wapo waliotoa wito wa kuwaombea wawili hao ili safari hii wafikie moja kwa moja hatua ya ndoa.
Mitandao ya kijamii, hususan Instagram, imeendelea “kuwaka” baada ya kusambaa kwa video na picha za Harmonize, Kajala na marafiki zao, zilizochochea hisia za mapenzi, utani na maswali ya wazi kutoka kwa mashabiki.
Wengi wa mashabiki wameonesha furaha yao, wakisema Kajala anaonekana ametulia, amekomaa na mwenye furaha ya kweli, huku wengine wakitamani huu uwe mwisho wa mzunguko wa kurudiana na kuachana kwa wawili hao.
Maneno kama “love is in the air,” “furaha zenu ni furaha ya wengi,” na “HK 2026” yameendelea kutawala sehemu ya maoni, yakionesha matumaini na sapoti kubwa kutoka kwa mashabiki.
Baadhi ya mashabiki wamefikia hatua ya kuwapa majina ya “Mama na Baba Harmonize”, ishara ya mapokezi chanya waliyonayo kwa sasa.
Hata hivyo, si kila mtu ameridhika. Wapo waliodai huenda ni kelele za mitandao au maigizo ya mastaa, huku wengine wakikumbusha historia yao ya nyuma na kusisitiza kuwa safari hii iwe ya mwisho, yenye utulivu bila drama.
Kwa ujumla, video na matukio yao yameibua hisia mchanganyiko za furaha, matumaini na tahadhari, yakithibitisha kuwa mahusiano ya Harmonize na Kajala bado yana mvuto mkubwa na uwezo wa kutawala mitandao ya kijamii.
Kwa kile kinachoendelea, wawili hao wanaendelea kuwa gumzo, huku madai yakienea kuwa Kajala ni mjamzito na kwamba Harmonize tayari ameshatoa mahari, kinachosalia ni hatua ya ndoa.
The post Harmonize na Kajala warudiana tena first appeared on SpotiLEO.
