Mamlaka ya Usafiri wa Anga Tanzania (TCAA) imeelekezwa na Kamati ya Bunge ya Miundombinu kuharakisha ujenzi wa Chuo cha Mafunzo ya Usafiri wa Anga (CATC) ili kuongeza uwezo wake wa uwekezaji na kuboresha mazingira ya mafunzo kwa wataalamu wa sekta ya anga.
Akiwa katika ziara ya tathmini ya maendeleo ya mradi huo, Mwenyekiti wa Kamati hiyo, Selemani Kakoso, alisisitiza umuhimu wa kukamilisha mradi huo haraka ili kuhakikisha mazingira bora ya kujifunzia, hasa kwa wanafunzi wa kimataifa.
“Mara ya mwisho wabunge walipokagua mradi huu, waliona wanafunzi hususan wale kutoka nje ya nchi wakijifunza katika mazingira yasiyofaa. Kwa hivyo, kamati inaitaka TCAA kuhakikisha mradi huu unakamilika haraka iwezekanavyo,” alisema Mheshimiwa Kakoso.
Wizara ya Uchukuzi, kupitia TCAA, inasimamia ujenzi wa CATC, mradi wenye thamani ya shilingi bilioni 78 za Kitanzania, unaotarajiwa kuanza Juni mwaka huu. Chuo hicho kinatoa mafunzo ya muda mfupi ya cheti katika nyanja kama vile udhibiti wa safari za anga, usalama, na upangaji wa safari za ndege, kwa wataalamu waliopo tayari kwenye sekta ya anga.
Naye Mkurugenzi Mkuu wa TCAA, Salim Msangi, alieleza kuwa ucheleweshaji wa awali ulitokana na taratibu muhimu za kibali. Hata hivyo, hatua kubwa zimepigwa, ambapo mnamo Januari mwaka huu, zabuni ya uchambuzi wa awali ilitangazwa. Kati ya waombaji sita, kampuni tatu ziliingia kwenye orodha fupi, na mapema Machi, kampuni hizo zilialikwa kuwasilisha zabuni zao, ambazo zitafunguliwa Machi 24.
“Baada ya tathmini ya zabuni na uchunguzi wa kina, tunatarajia kusaini mkataba na mkandarasi aliyeteuliwa mapema Mei,” alisema Bw. Msangi. “Ujenzi rasmi utaanza Juni mara tu baada ya malipo ya awali kukamilika.”
Kukamilka kwa ujenzi wa majengo mapya ya CATC yanatarajiwa kuleta mchango mkubwa katika kuimarisha sekta ya anga katika Afrika Mashariki na Kati kwa kuzalisha wataalamu wenye ujuzi wa hali ya juu na kuongeza vyanzo mbadala vya mapato kwa TCAA.
Mwenyekiti wa Kamati ya Kudumu ya Bunge ya Miundombinu, Selemani Moshi Kakoso akizungumza kuhusu umuhimu wa kukamilisha mradi wa Ujenzi wa chuo cha usafiri wa anga nchini(CATC) haraka ili kuhakikisha mazingira bora ya kujifunzia, hasa kwa wanafunzi wa kimataifa wakati wa ziara ya Kamati hiyo.
Naibu Waziri wa Uchukuzi, David Kihenzile akizungumza kuhusu namna wizara hiyo ilivyojipanga kusimamia Ujenzi wa chuo cha usafiri wa anga nchini(CATC) wakati wa Kamati ya Kudumu ya Bunge ya Miundombinu ilipofanya ziara katika ofisi za Mamlaka hiyo Ukonga- Banana jijini Dar es Salaam.
Mkurugenzi Mkuu wa Mamlaka ya Usafiri wa Anga Tanzania (TCAA), Bw. Salim Msangi akiwasilisha taarifa ya mradi wa Ujenzi wa chuo cha usafiri wa anga nchini(CATC) kitakachogharimu takribani bilioni 78 kwa Kamati ya Kudumu ya Bunge ya Miundombinu iliyofanya ziara katika ofisi za Mamlaka hiyo Ukonga- Banana jijini Dar es Salaam.
Meneja mradi wa CATC, Stephen Mwakasasa akionesha namna mwonekano wa Chuo cha usafiri wa anga nchini(CATC) mara baada ya kukamilika kitakavyokuwa kwa Kamati ya Kudumu ya Bunge ya Miundombinu.
Baadhi ya Wajumbe wa Kamati ya Kudumu ya Bunge ya Miundombinu wakichangia mada mara baada ya Mkurugenzi Mkuu wa Mamlaka ya Usafiri wa Anga Tanzania (TCAA), Bw. Salim Msangi kuwasilisha taarifa ya mradi wa Ujenzi wa chuo cha usafiri wa anga nchini(CATC).
Wajumbe wa Kamati ya Kudumu ya Bunge ya Miundombinu pamoja na baadhi ya wafanyakazi wa Mamlaka ya Usafiri wa Anga Tanzania (TCAA) wakifuatilia mada kwenye kikao hicho.
