Kila tarehe 7 ya mwezi April ni Karume Day – siku maalum ya kumkumbuka Sheikh Abeid Amani Karume, Rais wa Kwanza wa Zanzibar na Makamu wa Kwanza wa Rais wa Jamhuri ya Muungano wa Tanzania. Karume aliuawa kwa risasi Aprili 7, 1972, na kuzikwa kwa heshima zote kitaifa siku ya Jumatatu, Aprili 11, 1972, karibu kabisa na eneo alipouawa.
Maelfu ya wananchi walijitokeza barabarani, kutoka Ikulu ya Zanzibar hadi Kisiwandui – makao makuu ya Chama cha Afro-Shirazi (ASP) – kushuhudia safari ya mwisho ya kiongozi aliyekuwa na ushawishi mkubwa kisiasa, kijamii, na kitaifa.
Mwili wake ulibebwa kwa heshima kubwa na viongozi akiwemo Mwalimu Julius K. Nyerere, wanajeshi, na raia wa kawaida. Mwalimu Nyerere pia ndiye aliyekuwa wa kwanza kutupa udongo kaburini – ishara ya heshima kuu kwa rafiki na mshirika wake mkubwa wa kisiasa.
Kwa mujibu wa taarifa za wakati huo, watatu kati ya watu wanne walioshambulia Sheikh Karume waliuawa papo hapo, huku wa nne akijiua baada ya kujikuta amezingirwa na vikosi vya ulinzi wa taifa.
Chanzo: Makinikia ya Issa Michuzi
