Maelfu ya raia wa Hispania wamejitokeza kwa wingi katika miji mikuu kama Madrid, Barcelona, Malaga na San Sebastián kupinga kile wanachokiita mgogoro mkubwa wa makazi unaochochewa na utalii wa kupindukia na matumizi ya Airbnb.
Airbnb ni jukwaa linalowaruhusu watu kukodisha nyumba zao kwa wageni kwa muda mfupi—mara nyingi kwa watalii. Ingawa limeleta fursa ya kipato kwa wamiliki wa nyumba, pia limesababisha nyumba nyingi kutotolewa kwa wapangaji wa muda mrefu, na badala yake, kukodishwa kwa bei ya juu kwa wageni wa muda mfupi.
Katika mji wa Malaga, maandamano yamefanyika kupinga ongezeko la nyumba za likizo na athari zake kwa jamii za wenyeji. Waandamanaji wanasema kuwa ongezeko la upangishaji wa muda mfupi kwa watalii limepunguza upatikanaji wa makazi kwa wenyeji na kuongeza gharama za maisha.
- Katika jiji la Barcelona, karibu nyumba 1 kati ya 3 za kukodi zinaripotiwa kuwa zimewekwa kwenye Airbnb.
- Bei ya kodi kwa wapangaji wa kawaida imeongezeka hadi kufikia asilimia 68 katika miaka ya karibuni, hali inayofanya maisha kuwa magumu kwa wenyeji—hasa vijana na familia zenye kipato cha chini.
“Tunahitaji Nyumba, Sio Hoteli za Wageni”
Waandamanaji walisema wamechoka kuona majengo yote mazuri yakiuzwa au kukodishwa kwa watalii kupitia Airbnb, huku wao wakikosa mahali pa kuishi kwa bei nafuu. Miji kadhaa sasa inapendekeza sheria mpya:
- Kuzuia uuzaji wa ardhi kwa wageni
- Kufuta baadhi ya miradi ya ujenzi wa nyumba mpya za likizo
- Kupunguza au kufungia kabisa leseni za Airbnb kwenye maeneo ya mijini
Kwa mujibu wa The Guardian, wakazi wa mji wa San Sebastián walienda mbali zaidi—waliiandikia barua FIFA wakipinga mji wao kuwa mwenyeji wa Kombe la Dunia la 2030 wakisema tukio hilo litazidisha utalii na matatizo ya makazi.
Blogu maarufu ya The Sun imeandika kuwa kwa sasa, shinikizo linaongezeka kwa serikali za mitaa na kitaifa kurekebisha kanuni za upangishaji wa muda mfupi, ili kuhakikisha watu wa kawaida wanaweza kuishi katika miji yao bila kugombania nyumba na watalii kila siku.
