MKUTANO Mkuu wa Simba wa mwaka 2025, umeisha saa 5:59 asubuhi, huku ukiibua maswali kwa wanachama kutokana na aina ya ulivyomalizika.
Mkutano huo ambao awali ulihudhuriwa na wanachama 720, kisha baadae kuongezeka hadi 998, umemalizika huku wanachama hao wakiwa hawajui mustakabali wa yale yanayotakiwa kufanyiwa marekebisho.
Hatua hiyo, imejiri baada ya mapendekezo ya mabadiliko ya Katiba yalivyomalizwa kusomwa, ambapo ghafla Mwenyekiti wa Simba, Murtaza Mangungu alitangaza Mkutano huo kumalizika.
Baada ya hatua hiyo, ndipo pakaibuka sintofahamu kwa wanachama waliodai kudharauliwa na Mangungu na kumtaka ajiuzulu mara moja kwa kumaliza mkutano huo bila kujadili jambo muhimu lililowaleta.
Wanachama hao kwa umoja wao, walipaza sauti wakimtaja ajiuzulu, huku wakidai sababu za kufanya vibaya kwa timu hiyo ni kutokana na hali iliyojitokeza leo kwenye mkutano mkuu.
Wanachama wa Simba walimvaa l Mangungu wakidai amefunga mkutano huo kihuni.
Mara baada ya wakili Ngasa Mboje kumaliza kusoma vifungu vya marekebisho ya Katiba ya Simba, wanachama wakasubiri kupitisha kimoja kwenda kingine.
Hali haikuwa hivyo, kwani Msemaji wa Simba, Ahmed Ally akawataka wanachama kujiandaa na hatua inayofuata ambapo hatua hiyo ilipomalizika Mangungu akaitisha dua ya kuiombea Simba inayocheza mechi ya Ligi ya Mabingwa ugenini dhidi ya Stade Malien. Mechi inapigwa leo saa 1:00 usiku jijini Bamako.
Dua hiyo ilipokamilika Mangungu akatangaza akidi ya mkutano kuwa umehudhuriwa na wanachama 998, kisha kufunga mkutano huo.
Baada ya Mangungu kutangaza hilo makundi ya wanachama yakamvamia na kuanza kumlalamikia kwamba hawakuridhishwa na hatua za kufunga mkutano huo hali ya kuwa hawajapitisha vifungu hivyo kwa hatua.
Hata hivyo, licha ya wanachama hao kulalamika Mangungu alisimamia msimamo wake kisha kuondoka na kuwaacha wanachama wamemvaa wakilalamikia hatua hiyo.
MANGUNGU ABANWA
Wakati ikisomwa ripoti ya mapato na matumizi ya mwaka uliopita, umeibuka mzozo baada ya hoja kumbana Mwenyekiti wa Simba Murtaza Mangungu.
Baada ya kusomwa ripoti ya mwaka jana ya mapato na matumizi mwanachama Hussein Simba, akauliza juu ya uhalali wa ripoti hiyo hali ya kuwa haijapitishwa na mkaguzi wa nje wa masuala ya fedha.
Aidha, Simba akaongeza kuwa tayari ameshaushitaki uongozi wa Simba kuanzia Mwenyekiti wake Mangungu kwa Baraza la Michezo (BMT) juu ya uvunjifu wa kanuni kwa klabu kutokuwa na mkaguzi huku akihoji kama uongozi huo unatosha kuongoza klabu hiyo.
Baada ya Simba kuibua hoja hiyo, huku akishangiliwa na wanachama wenzake, Mangungu alijibu hoja hiyo akisema: “Nakushukuru ndugu yangu kwa hoja yako, lakini naona wewe una tatizo lako binafsi na Mangungu lakini kama ni hivyo basi tutakutane kwenye uchaguzi” alisema Mangungu.
Mara baada ya Mangungu kujibu hoja hiyo, wanachama walianza kumpinga na kuibua mzozo ndani ya ukumbi huo wakionyesha kupinga majibu hayo ya mwenyekiti wao.
Hata hivyo, Ofisa Mtendaji Mkuu, Zubeda Sakuru, aliutuliza ukumbi huo alifafanua kuwa mkaguzi wa awali aliandika barua ya kuachia nafasi hiyo na sasa wapo katika mchakato wa kutafuta mwingine.
“Baada ya mkaguzi wa awali kujiuzulu, tupo kwenye mchakato wa kumtafuta mwingine kwa mujibu wa taratibu, mpaka sasa tumewapata watatu na tukimaliza tutawaletea kwenye mkutano ujao,” alisema Sakuru na kuwapunguza makali wanachama wa klabu hiyo.
The post MKUTANO MKUU SIMBA:….MANGUNGU AWASHIWA MOTO…..WANACHAMA WAMTAKA AJIUZULU… appeared first on Soka La Bongo.
