Apps and Girls kwa kushirikiana na Yas Tanzania wameadhimisha mahafali ya kundi lingine la wahitimu wa programu ya Jovia, mpango unaolenga kuwawezesha wasichana kupitia teknolojia na ujasiriamali.
Tangu kuanzishwa kwake mwaka 2019, Jovia imekuwa jukwaa muhimu kwa wasichana kupata ujuzi wa kidigitali, maarifa ya biashara, na ushauri, hatua inayochangia kupunguza pengo la kijinsia katika nyanja za Sayansi, Teknolojia, Uhandisi, na Hisabati (STEM).
Mwaka huu, programu ya Jovia imefanikiwa kuwahusisha wasichana 35 kutoka mikoa mbalimbali ya Tanzania, wakiwemo 18 kutoka nje ya Dar es Salaam. Ili kuhakikisha mazingira salama ya kujifunzia, Apps and Girls ilianzisha hosteli ya malazi kwa washiriki wanaotoka mbali, jambo lililowezesha ushiriki wao katika mafunzo kwa ufanisi zaidi.
Akizungumza wakati wa hafla hiyo, mgeni rasmi alipongeza jitihada za Apps and Girls na Yas Tanzania kwa kuwezesha vijana wa kike kufikia ndoto zao. “Jovia inabadilisha maisha! Mafanikio ya wahitimu wetu yanaonesha kuwa wakati wasichana wanapowezeshwa, wanageuza ndoto kuwa uhalisia na kuchangia maendeleo ya jamii zao,” alisema.
Kati ya wahitimu wa mwaka huu:
Wahitimu 7 wamepata ajira na wanajiunga na soko la ajira wakiwa na ujuzi wa kutosha.
Wahitimu 5 wanaendelea na elimu ya juu, wakichukua hatua zaidi za maendeleo binafsi.
Wahitimu 25 wameanzisha biashara zao, wakitumia maarifa waliyojifunza kubuni na kukuza miradi yao.
Kwa upande wake, Apps and Girls ilitoa shukrani za dhati kwa Yas Tanzania kwa mchango wao mkubwa katika kufanikisha programu hii. “Tunashukuru kwa msaada wa wadau wetu ambao wamekuwa sehemu ya mafanikio haya. Ushirikiano huu unatoa fursa kwa wasichana wengi zaidi kuingia kwenye sekta ya teknolojia na ujasiriamali,” ilisema Apps and Girls.
Wahitimu wa Jovia 2025 wamehimizwa kuendelea kutumia ujuzi walioupata kwa manufaa yao binafsi na jamii kwa ujumla. “Hii ni hatua moja tu katika safari yenu. Tunawaamini kama viongozi wa kesho, wavumbuzi, na wabunifu wa suluhisho zitakazobadilisha dunia.”
Meneja Mahusiano ya Nje wa Yas, Bi. Rukia Mtingwa (wa tatu kushoto), akikabidhi cheti cha kuhitimu programu ya Jovia kwa Bi. Martha Chomola. Programu hiyo inayoratibiwa na Taasisi ya Apps and Girls kwa udhamini wa Yas, inatoa mafunzo kwa mabinti katika nyanja ya teknolojia. Hafla hiyo imefanyika hivi karibuni jijini Dar es Salaam. Wengine pichani ni Afisa Mtendaji Mkuu wa Apps and Girls, Bi. Carolyne Ekyarisiima (wa pili kushoto), na Mshauri wa Masuala ya Ujasiriamali, Bi. Lucian Mwashala (kulia).
