Katika tukio la kipekee lenye kuacha hisia za kiroho na fahari kubwa kwa taifa, tunakukutanisha na binti wa Kitanzania Theresia Pascas Seda ambaye ameandika historia alipokutana uso kwa uso na aliyekuwa Kiongozi Mkuu wa Kanisa Katoliki duniani, Hayati Papa Francis, na kupata nafasi adimu ya kumuombea mbele ya hadhira ya kimataifa mjini Vatican.
Kupitia video iliyorushwa kwenye ukurasa wa YouTube wa mpiga picha mashuhuri nchini Tanzania, Imani Nsamila, binti huyo anaelezea hisia zake kwa upole na heshima, akisema tukio hilo lilikuwa kama ndoto iliyotimia — “siku ya baraka ya kipekee ambayo haitasahaulika.”
Katika tukio hilo, binti Theresia ambaye alikuwa sehemu ya ujumbe rasmi wa Tanzania nchini Vatican ulioongozwa na Rais Samia Suluhu Hassan tarehe 11 na 12 Februari 2024, alipewa nafasi ya kusali kwa ajili ya Papa Francis, jambo ambalo limewagusa wengi, na kuwa ishara ya heshima kubwa kwa Tanzania na kwa vijana wa Kiafrika wanaochipuka na kuwa sauti ya matumaini duniani.
Akiwa amevaa mavazi ya heshima yanayoashiria utulivu wa kiroho, na akizungumza kwa unyenyekevu, aliwakilisha si tu imani yake ya kidini, bali pia maadili na utamaduni wa Mtanzania.
