Katika tukio la kisiasa lililoibua mjadala mkubwa, Kada wa CCM Jimbo la Nzega Vijijini, Ndugu Neto Kapalata, ameibuka mshindi katika kura za maoni kwa kupata kura 2,570, akimshinda aliyekuwa Mbunge wa jimbo hilo, Dkt. Hamis Kigwangalla, ambaye alipata kura 1,715.
Katika mchakato huo, CPA Robert Masegere naye aliibuka na kura 1,635, akifuata kwa karibu nyuma ya Kigwangalla, hali inayoashiria ushindani mkubwa kati ya wagombea watatu hao.
Ushindi wa Kapalata umetafsiriwa na wachambuzi wa siasa kuwa ni “jambo la kustaajabisha mithili ya mende kuangusha kabati”, ikizingatiwa uzoefu, ushawishi na nafasi ya Kigwangalla ndani ya chama na katika siasa za kitaifa.
Matokeo haya yanaweza kuwa na athari kubwa katika sura ya siasa za Nzega Vijijini, na yanaashiria mabadiliko ya mitazamo miongoni mwa wajumbe wa CCM katika ngazi ya jimbo.
