Marekani Yaituhumu Urusi, China na Korea Kaskazini Kupanga Njama

Rais wa Marekani, Donald Trump. Rais wa Marekani, Donald Trump, ameibua shutuma nzito dhidi ya viongozi wa mataifa matatu yenye nguvu duniani, akiwatuhumu kupanga njama za kuihujumu Marekani. Akizungumza kupitia taarifa iliyotolewa na Ikulu ya White House, Trump alisema kuwa Rais wa Urusi, Vladimir Putin, Rais wa China, Xi Jinping, na Kiongozi wa Korea Kaskazini,... Read More

Prof. Kitila Mkumbo Kufungua Wiki ya Utafiti na Ubunifu UDSM

SERIKALI YAJENGA SHULE YA KISASA YA WASICHANA NA SHULE YA AMALI MKOANI MWANZA

Rais wa Marekani, Donald Trump, ameibua shutuma nzito dhidi ya viongozi wa mataifa matatu yenye nguvu duniani, akiwatuhumu kupanga njama za kuihujumu Marekani. Akizungumza kupitia taarifa iliyotolewa na Ikulu ya White House, Trump alisema kuwa Rais wa Urusi, Vladimir Putin, Rais wa China, Xi Jinping, na Kiongozi wa Korea Kaskazini, Kim Jong Un, wanaendelea kushirikiana katika kile alichokiita “muungano wa kijeshi na kiitikadi unaolenga kudhoofisha nafasi ya Marekani duniani.”

Kauli hiyo imekuja wakati viongozi hao watatu wakihudhuria gwaride kubwa la kijeshi lililofanyika jijini Beijing, China, ikiwa ni sehemu ya maadhimisho ya kumbukumbu ya miaka 80 tangu kumalizika kwa Vita vya Pili vya Dunia. Sherehe hizo zimehudhuriwa na maelfu ya watu, zikiwa na maonesho ya vikosi maalum vya kijeshi, silaha za kisasa, na mbwembwe zilizoonyesha nguvu za kijeshi za taifa hilo.

Kwa mujibu wa wachambuzi wa siasa za kimataifa, uwepo wa Putin na Kim Jong Un bega kwa bega na Xi Jinping katika tukio hilo unaleta taswira ya mshikamano mpya unaojengwa kati ya mataifa hayo matatu, ambayo mara nyingi yamekuwa yakikosana na Marekani katika masuala ya usalama wa kimataifa, migogoro ya kiuchumi, na uhusiano wa kidiplomasia.

Trump ameonya kuwa Marekani haitavumilia kile alichokitaja kama juhudi za wazi za kuunda kambi pinzani, akibainisha kuwa taifa lake linaendelea kuimarisha ushirikiano wake na washirika wa NATO pamoja na nchi nyingine rafiki barani Asia. “Marekani iko tayari kulinda masilahi yake kwa gharama yoyote ile,” alisema Trump, akisisitiza kuwa Washington haitarudi nyuma mbele ya kile alichokiita vitisho vinavyoibuka kutoka Beijing, Moscow na Pyongyang.

Hata hivyo, serikali ya China imepuuzilia mbali kauli hizo, ikisisitiza kuwa maadhimisho hayo yalikuwa ni ya kihistoria na hayakuhusiana na mipango yoyote ya kijeshi dhidi ya taifa jingine. Wawakilishi wa Urusi na Korea Kaskazini nao walitoa taarifa zenye mwelekeo sawa, wakisema ushiriki wao ulikuwa ni wa heshima kwa kumbukumbu ya historia ya pamoja na siyo alama ya mpango wowote wa kiusalama dhidi ya Marekani.

Hali hii imezidisha wasiwasi kuhusu uhusiano kati ya mataifa haya makubwa, huku wachambuzi wakitazama hatua hiyo kama mwanzo wa sura mpya katika ushindani wa kijiopolitiki unaoweza kuathiri amani na uthabiti wa dunia.

STORI NA ELVAN SITAMBULI | GPL