Na Meleka Kulwa – Fullshangwe Blog, Dodoma
Mradi wa ujenzi wa vyoo vya kisasa unaotekelezwa na Shirika la Habitat for Humanity Tanzania.katika mnada wa Kigwe, Wilaya ya Bahi mkoani Dodoma kwa lengo la kuboresha mazingira pamoja na afya za wananchi wanaotumia mnada huo na wanaouzunguka.
Akizungumza wakati wa ziara ya ukaguzi wa maendeleo ya mradi Februari 13, 2026, Kigwe, Bahi, Mkurugenzi wa Miradi wa Shirika la Habitat for Humanity Tanzania, Bw. John Massenza, amesema kuwa changamoto kubwa iliyokuwepo katika maeneo ya minada ni upungufu wa vyoo na huduma duni za usafi wa mazingira, hali iliyokuwa inahatarisha afya za watumiaji wa minada na wananchi wanaoizunguka. Ziara hiyo ilihudhuriwa pia na wanachama wa UDOM Health Club.
Amebainisha kuwa mnada wa Kigwe unahudumia wastani wa watu 2,000 hadi 2,500, huku ukiwa na matundu mawili tu ya vyoo, hali isiyokidhi mahitaji ya wananchi. Aidha, Bw. Massenza ameeleza kuwa kukamilika kwa mradi huu kutawezesha kuhudumia zaidi ya wananchi 2,000, ikileta maboresho makubwa ya afya na usafi wa mazingira katika mnada huo.
Ameongeza kuwa mradi huo unahusisha ujenzi wa jengo lenye vyumba kumi na tatu likijumuisha vyoo maalum kwa watu wenye ulemavu, chumba cha kubadilishia pedi kwa wanawake pamoja na chumba maalum kwa akina mama wanaonyonyesha ili kuwapatia faragha wanapokuwa katika shughuli zao za kiuchumi.
Kwa upande wa vijana walioshiriki katika mradi huo, Martine Sanga, mwanafunzi wa Chuo Kikuu cha Dodoma na mwanachama wa UDOM Health Club, amesema kujitolea katika miradi ya kijamii kunasaidia kuboresha afya za jamii pamoja na kujenga mshikamano miongoni mwa vijana. Aidha, amebainisha kuwa ametoa wito kwa wanafunzi wenzake kujitokeza kushiriki shughuli za kujitolea kwa lengo la kusaidia jamii na kujenga kizazi chenye afya bora. Ameongeza kuwa ushiriki wa vijana katika miradi ya maendeleo unachangia kuleta mabadiliko chanya na kuimarisha ustawi wa wananchi.
NayeNaye Emiliana Sanga, mwanafunzi wa Chuo Kikuu cha Dodoma na mwanachama wa UDOM Health Club, amesema kupitia ushiriki wao wameona umuhimu wa kusaidia jamii zenye uhitaji hasa katika maeneo ya vijijini. Aidha, amebainisha kuwa misaada ya kujitolea huchangia kupunguza changamoto za kiafya na kuboresha maisha ya wananchi. Ameongeza kuwa ametoa wito kwa vijana na wadau mbalimbali kuungana katika kusaidia miradi ya kijamii ili kujenga jamii yenye afya na mazingira salama.
Kwa upande wa serikali, Afisa Mifugo Mfawidhi wa Halmashauri ya Wilaya ya Bahi, Peter Shirima, amesema bado kuna upungufu mkubwa wa vyoo vya kisasa katika minada ambapo nyingi zina matundu mawili pekee yasiyokidhi mahitaji ya wananchi. Aidha, amebainisha kuwa ujio wa wadau hao umesaidia kupunguza adha iliyokuwa inawakumba wananchi pamoja na kuboresha utunzaji wa mazingira kwa ujumla.
Kwa upande wake, Afisa Mazingira wa Halmashauri ya Wilaya ya Bahi, Bi. Joyce Jackson, amesema idara yake imejipanga kufanya ukaguzi wa mara kwa mara katika maeneo ya minada ili kuhakikisha usafi pamoja na uhifadhi sahihi wa taka. Aidha, amebainisha kuwa elimu itaendelea kutolewa kwa wadau wa minada kuhusu matumizi sahihi ya vyoo na utunzaji wa mazingira. Ameongeza kuwa kwa mujibu wa sheria, yeyote atakayekiuka matumizi sahihi ya vyoo atalipa faini isiyozidi shilingi elfu hamsini.
